De causas e d'autras

Uèi, ai començat de legir lo poèma mai conegut de Frederic Mistral: Mirèlha. Es un poèma en dotze cants. Lei premiers vers son fòrça polits e per aquò, ai volgut vos lei copiar aquí:

Extrach de "Mirèlha"

Cante una chata de Provènça.
Dins leis amors de sa jovènça,
A travès de la Crau, vèrs la mar, dins lei blats,
Umble escolan dau grand Omèra,
Ieu la vòle seguir. Come èra
Rèn qu'una chata de la tèrra,
En fòra de la Crau se n'es gaire parlat.

E mai son frònt non lusiguèsse
Que de joinessa; e mai n'aguèsse
Ni diadèma d'òr ni mantèu de Damàs,
Vòle qu'en glòria fugue auçada
Come una rèina, e careçada
Pèr nòsta lenga mespresada,
Car cantam que pèr vautre', ò pastre' e gènts dei mas!

Es fòrça polit tot aquò, non? :)

E per rendre un omenatge a Frederic Mistral, sauvaire dau provençau, vos còpii lo tèxte dins sa grafia originala, la grafia mistralenca:

Extrach de "Mirèio"

Cante uno chato de Prouvènço.
Dins lis amour de sa jouvènço,
A travès de la Crau, vers la mar, dins li blad,
Umble escoulan dóu grand Oumèro,
Iéu la vole segui. Coume èro
Rèn qu'uno chato de la terro,
En foro de la Crau se n'es gaire parla.

Emai soun front noun lusiguèsse
Que de jouinesso; emai n'aguèsse
Ni diadèmo d'or ni mantèu de Damas,
Vole qu'en glòri fugue aussado
Coume uno rèino, e caressado
Pèr nosto lengo mespresado,
Car cantan que pèr vautre, o pastre e gènt di mas !

Enfin!! Premiera victòria per lei crocodils dau Nimes Olimpic!! Foguèt ièr, còntra Tròias, a l'estadi de l'Auba, per la quatrena jornada dau campionat de Liga 2. Ganhèron 1-0, ambé un but de Mickaël Colloredo. Esperem que siá pas la darrièra! Son a la dètz-e-uechena posicion ambé 3 ponchs.

Un autre motiu de satisfaccion per ièu uèi es la victòria de l'OM au Velodròm, còntra lo FC Sochaux Montbéliard ambé 2 buts per lei marselheses (Ziani e Koné) e un but per Sochaux (Erding). Contunhan d'ocupar la premiera plaça dau classament de Liga 1 ambé 10 ponchs. Deman joga l'Olimpic Lionés que pòt tamben aver 10 ponchs se ganha còntra lei Verds de Sant-Estève.

Lo bloguitge es un malhum de blògs occitans.

L'idea es que cada blogaire dau Bloguitge bote la lista deis autres socis sus lo sieu blòg, per melhorar lo referenciament per lei motors de recerca dei blògs en lenga nòstra, e ansin los faire conéisser au mai de gents possible.

La carta dau Bloguitge es simpla: volèm defendre e difusir la lenga occitana en l'utilizant sus l'Internet per parlar de tot.

Dins lo Bloguitge i a de blògs en totei lei dialectes de la lenga occitana e de totei lei parçans dau nòstre païs. Se vòls èstre dins lo Bloguitge, sèc aqueste ligam ò escriu-me un comentari ambé l'adreça dau tieu blòg!

Aquò's fòrça important se vòlem faire "renàisser" l'occitan sul oèb!!!

Ièr, i aguèt lo tiratge au sòrt deis equipas per la Liga dei Campions dins la quala i a l'OM que s'a qualificat. Lo grop de l'OM es:

LIVERPOOL (Englaterra)
PSV EINDHOVEN (Païses Basses)
OLIMPIC DE MARSELHA
ATLÉTICO DE MADRID (Espanha)

Es un grop fòrça dificile per l'OM per amòr que leis equipas son totei d'un niveu fòrça aut: e mai l'Atlético de Madrid, qu'es supausat èstre l'equipa mai febla dau grop, es un gigant dau fotbòl internacionau qu'a una ataca meravilhosa aquesta sason ambé lo "Kun" Agüero e Forlán... E parlarai pas de Liverpool o dau PSV....

Mai la bona nòva per ièu es que l'1 d'octòbre serai a Madrid e es lo jorn de la partida entre l'OM e l'Atlético, dins l'estadi Calderón! I anarai segurament, a l'estadi Calderón, o vòli pas mancar!!! Tamben fau dire que fòrça dei mieus amics madrilencs son d'afogats de l'Atlético, e segur qu'anarai pas solet a l'estadi ;) I aurà quauqu'un per m'acompanhar ;)

                    

La premiera partida de l'Olimpic de Marselha dins aquesta Liga dei Campions serà lo 17 de setembre, còntra Liverpool, a l'Estadi Velodròm a Marselha.

L'Olimpic de Marselha a ganhat uèi còntra l'equipa norvegiana dau Brann de Bergen 2-1 a l'Estadi Velodròm. (2 buts de Mamadou Niang!!!) Coma ja avián ganhat ailí 1-0, aquò vòl dire que l'OM tòrna a la Liga dei Campions aquesta sason!!!

Bonjorn a totei!

Uèi vòli escriure subre quauqua ren que me gonfla fòrça... Totei sabètz çò qu'es passat fa quaquei jorns a l'aeropòrt de Madrid-Barajas... O vau pas contar encara mai o fau dire... quina catastròfa! Mai de 150 mòrts dins aqueste accident de l'avion de Spanair... M'a força emogut, perque ambé tot lo temps que vivi a Madrid, me senti pròche dei madrilencs. Quaquei dei mieus amics m'an telefonat, perque sabon que preni sovent l'avion a Madrid. Mai urosament, èri pas dins aqueste avion.

Mai ço que foguèt pièger, foguèt l'encanhament dei jornalistas aprèp la catastròfa: còntra la companha d'aviacion, còntra lo govèrn espanhòu (qu'auriá pas fach pro d'inspeccions subre aquesta companha), còntra lei mecanicians de l'aeròport, còntra lei secors de l'aeròport, còntra Dieu qu'a pas empachat l'accident, e sabi pas quanteis autras conarias.. E tamben la curiositat maussana dei jornalistas, que sabon qu'una catastròfa ambé talament de mòrts e de nafrats vend pus que leis aventuras de la Paris Hilton ò meme dau pichon Nicolas e de la sieuna granda Carla... Boscan leis istòrias de la vida dei mòrts (...) e descrivon ambé un fum de detalhs lei nafras d'aquélei qu'an subreviscut...

E aprép, coma se bastèsse pas, aquelei jornalistas meravilhoses assagèron (e contunhan d'o faire) de crear un sentiment de panica, en contant cada jorn d'incidents dins leis avions... Vaicí un accident mortau d'un avion en Quirguizstan, vaquí un incident d'un avion de Ryanair en Lemòtges dins lo quau i aguèt pas cap de mòrt... E uèi un autre avion que sortís de la pista en aterrant... Encara pas cap de victima... Lei doás darriers incidents foguèron contats suncament per crear de panica... e vendre de jornaus! Se aguèsse pas agut l'accident de Madrid, auriam pas jamai ausit parlar d'aquò... E auriá pas res cambiat!!

Adieussiatz a totei!

Aquò's lo mieu premier messatge dins aqueste blòg e espèri qu'es pas lo darrièr! Dins aqueste blòg, assajarai d'escriure subre tot çò que m'interessa, mai o vòli faire en occitan!

Ai de dire que sabi pas ben parlar occitan, l'apreni, mai es malaisit o faire solet. Siáu nascut an Avinhon, mai siáu pas d'una familha occitana e per aquò l'occitan es pas estat la premiera lenga qu'ai mestrejat. Mai la vòli aprene perque pensi qu'es fòrça important de saupre parlar la lenga de la sieuna region. Demòri a Puèg-Aut (Pujaut) dins lo Gard provençau, gaire luenh dau centre d'Avinhon (Vau-Clusa).

Pendent l'annada escolara demòri a Madrid, onte estúdii dins l'Universitat Politécnica, dins la Facultat de Topografia, Geodesia e Cartografia. Ja ai fach una annada ailí, e me demòra autra annada. M'agrada fòrça çò qu'estúdii perque m'agrada tot ço qu'a de vèire ambé la cartografia. Farai un pòst subre ma vida d'estudiant un autre còp.

Perdonatz-me per totei lei decas qu'ai fachas dins aqueste pòst, mai era lo premier!! Aqueste blòg es tamben un biais per ièu de melhorar mon nivèu de lenga... E vos prometi que l'article que vén será fòrça mai interessant que la mieuna vida ;)

Lo poton a totei!