De causas e d'autras

Bonjorn en totei!!

Non, ai pas encara desaparegut totalament!!! Mai aquesta darrièra setmana foguèt un pauc cargada per ièu! Era la premiera setmana de cors per aquesta annada universitaria...E lei professors an decidit de començar un pauc fòrt... Ges de presentacion per la majoritat dei matèrias... Preferissiái lei dintradas de l'escòla primaria ;)

Vau assajar de far un resumit d'aquela setmana:

-lei cors: lei professors son un pauc estranges mai quasi totei ben simpatics... Çò que m'agrada lo mens es que per anar ai cors dau dijous (Amenatjament dau territòri), me fau prendre la veitura per anar de l'autre costat de Madrid, a l'escòla de camins, canaus e pòrts (qu'es pas mon escòla, mai coma lei professors son d'ailà se desplaçan pas!)... E aqueste dijous, i siáu anat ambé una amiga en veitura e nos siám perduts dins lei tuneus sota Madrid (l'autorota M-30...)... Mai après una ora (e mai de 1000 taxis que nos cridèron dessus per qu'anèssem mai rapidament...) avèm trobat l'escòla....

-l'annada passada èri l'unic estudiant estrangièr (o quasi l'unic) de tota l'escòla a Madrid e ara siám 5 forestiers dins ma classa! Ièu, 3 gabachos (es coma se dison lei frances per leis espanhòus), una alemanda... E i a tamben una basca, mai es arribada a l'escòla l'annada passada coma ièu ;) Ambé dos dei frances, aièr siám anats a Toleda, en Castilha. Cresi qu'es lo uechen còup qu'i vau e m'agrada totjorn :)

-Gramarci a Jan-Pèire que m'a mandat son libre per aprene lo provençau "Òsca!". L'ai pas encara començat mai cresi que va m'ajudar fòrça dins mon aprendissatge de l'occitan.

-Per acabar, parlem un pauc d'espòrt:

Desfacha de l'OM a Madrid, còntra l'Atletico 2-1, per la liga dei Campions. Mai lo mai important de la partida foguèt pas malurosament la partida mai çò que se passèt dins l'estadi, entre la policia espanhola e leis afogats de l'Olimpic de Marselha, e tot aquò se passèt a causa d'una banderola ambé ren de realament acipant... E tamben voliáu dire que foguèri decebut per l'actituda racista de quauqueis afogats de l'Atletico... L'Atletico e Liverpool an 6 ponchs, e Marselha e lo PSV 0.

Victòria de l'OM en campionat còntra Caen 2-1.

Lo marrit pantais dau Nimes Olimpic dins lo campionat de Liga 2 s'arresta pas... Desfacha 5-0 còntra lo Racing (d'Estrasborg) a l'estadi de la Meinau... Lei crocodils an sonque 5 ponchs e son darrièrs. Estrasborg es premier. Va èstre dificile de se mantenir en Liga 2!

Méfi: dins aqueste messatge mon paure cerveu a pas foncionat!

Bonjorn a totei!

Vos escrivi dau mieu apartament a Madrid!

Ai tornat aièr, ambé la veitura. "Sonque" son 10 oras de viatge, 12 oras au totau se comptam lei pausas... Es un pauc longuet subretot qu'èri solet per far tot lo viatge! Sonque m'acompanhavan la ràdio que foncionava pas entre lei montanhas (e n'i a un fum entre Avinhon e Madrid^^), lo lector mp3 dins lo quau avià pas mes pron de cançons, lei panèus tot en francés entre Avinhon e la frontiera ambé Catalonha, tot en catalan fins a Fraga en Aragon e tot en castelhan fins a Madrid! En fach, es pas verai que lei panèus eran totei en catalan en Catalonha, qu'ai vist un panèu direccion..... VIELHA escrich en occitan :D E tambén m'acompanhavan un fum de camions, qu'aviàn decidit totei de prene la meteissa rota que ièu... Subretot qu'i avià un fum d'òbras, e sovent i avià pas qu'una via sus l'autorota e podià pas despassar...

Lo darrièr còup qu'aviái tornat a Madrid l'aviái fach en avion, es fòrça mai rapide mai aqueste còup es lo retorn "definitiu" (per aquesta annada) e coma ai besonh de la veitura aicí a Madrid... E òc, es la fin dei vacanças d'estiu (e tambén la fin de l'estiu (aièr fasià un freg pendent lo viatge... Podiá pas creire qu'anavi vèrs lo sud...)

Uèi era lo jorn per m'inscriure a la fac, e aqueste còup m'an laissat m'inscriure sensa problema! Oficialament a partir de uèi, siáu un vertadier estudiant en segonda annada d'engenhairia superiora en geodesia e cartografia!! (Ja o sabi que fa un pauc pedant coma nom mai l'ai pas chausit ièu ;)) Comenci lei cors lo 29 de setembre (ja o ai escrich aquò, non?)

Siáu un pauc partejat entre dos sentiments ara: siáu content perque vau tornar veire meis amics madrilencs mai pas tròp content e un pauc triste de laissar meis amics avinhonencs e ma familha...

En de mai, aquesta sera l'OM a perdut còntra Sochaux per la copa de la Liga... Ai vist la partida per Internet despuèi Madrid... Era vertadierament afrós de veire lo niveu de l'OM a una semana de la partida còntra l'Atletico aicí a Madrid per la liga dei Campions... Sabi pas se vòli veire aqueste desastre en dirècte dins l'estadi o se l'anarai veire ambé d'amics dins un bar per poder demembrar la desfacha ambé d'alcòl.... ;) La partida es l'1 d'octòbre...

Desolat, mai ai parlat vertadierament de tot e de ren dins aqueste messatge ;) Per terminar aqueste messatge totalament incoerent, vau escriure çò qu'ai dich a un dei mieus amics madrilencs uèi... Parlèvem de causas e d'autras (pas dau blòg non ;)) e m'a dich quauqua ren coma, en parlant d'economia:

"...nos vamos a comer a los franceses con patatas..."
= "Anam manjar lei francés ambé de tartiflas"

Ai pensat directament a la tortilha espanhòla que se cosina ambé de tartiflas mentre l'aumeleta francesa se cosina sensa tartiflas... L'aumeleta coma metafòra economica... A meditar :D

• Uèi, la candidatura "Marselha Provença 2013" a ganhat la seleccion de la capital europenca de la cultura, còntra Bordèu, Lion e Tolosa. Mai en legir la presentacion de la candidatura ai pas vist ren subre la cultura provençala... Espèri qu'au final i aurà quauqua ren de provençau dins tot aquò... Es una ocasion de pas mancar!

• Mai lei fotbolaires de l'Olimpic de Marselha an pas agut tant d'astre... An perdut 2-1 còntra Liverpool en la Liga dei Campions, a l'estadi Velodròm de Marselha...  Avián ben començat la partida, ambé lo but de Cana a la vint-e-quatrena minuta, mai aqueste but leis an desestabilisat totalament e per aquò, leis angleses an pogut metre dos buts (dos buts de Gerrard). Pendent la segonda mièg-temps, an ben jogat lei marselheses mai n'an pas pogut cambiar lo resultat: desfacha 2-1... Faudrá ganhar an Eindhoven e a Madrid per lei doás partidas que venon...

Aièr, a l'estadi Chaban-Delmas de Bordèu, Marselha a obtengut lo ponch de la partida nula còntra lei Girondins, ambé un but de Koné a la tresena minuta per l'OM e un but de Chamakh a la vint-e-cinquena minuta per Bordèu. Es un plan bon resultat per l'OM. Mai lo problema es que l'arbitre de la partida entre Lion e Niça a donat la victòria a Lion ambé un penaltì inexistent per Lion al darrièr moment... Per aquò, ambé 11 ponchs, l'OM es segond dau campionat de Liga 1. Lion es premier ambé 13 ponchs.

Una autra desfacha per lei crocodils dins lo campionat de Liga 2... Còntra Tors, que venon tamben dau campionat de Nacionau... Pas cap de but per Nimes, encara un cop... Sabi pas çò que se passa... Pas degun sap çò que se passa... Una defensa catastrofica, pas ges d'eficacitat en ataca. e tamben fòrça mau astre... e coma resultat: 3 ponchs en 6 jornadas... E una eliminacion au segond torn de la Copa de la Liga... Aquesta sason comença coma un marrit pantais...

Lei crocodils dau Nimes Olimpic an perdut sa partida còntra Châteauroux  (Liga 2) dau segond torn de la Copa de la Liga, ambé 3 buts per lei Berrichons e soncament 1 but per Nimes. S'es acabat la Copa de la Liga. Lor demoran la Copa de França (qu'agrada fòrça ai crocodils...) e lo campionat... Esperem una melhora prestacion en campionat, còntra Tors, aqueste divendres. Fau sortir de la zona roja!

Enfin!! Premiera victòria per lei crocodils dau Nimes Olimpic!! Foguèt ièr, còntra Tròias, a l'estadi de l'Auba, per la quatrena jornada dau campionat de Liga 2. Ganhèron 1-0, ambé un but de Mickaël Colloredo. Esperem que siá pas la darrièra! Son a la dètz-e-uechena posicion ambé 3 ponchs.

Un autre motiu de satisfaccion per ièu uèi es la victòria de l'OM au Velodròm, còntra lo FC Sochaux Montbéliard ambé 2 buts per lei marselheses (Ziani e Koné) e un but per Sochaux (Erding). Contunhan d'ocupar la premiera plaça dau classament de Liga 1 ambé 10 ponchs. Deman joga l'Olimpic Lionés que pòt tamben aver 10 ponchs se ganha còntra lei Verds de Sant-Estève.

Ièr, i aguèt lo tiratge au sòrt deis equipas per la Liga dei Campions dins la quala i a l'OM que s'a qualificat. Lo grop de l'OM es:

LIVERPOOL (Englaterra)
PSV EINDHOVEN (Païses Basses)
OLIMPIC DE MARSELHA
ATLÉTICO DE MADRID (Espanha)

Es un grop fòrça dificile per l'OM per amòr que leis equipas son totei d'un niveu fòrça aut: e mai l'Atlético de Madrid, qu'es supausat èstre l'equipa mai febla dau grop, es un gigant dau fotbòl internacionau qu'a una ataca meravilhosa aquesta sason ambé lo "Kun" Agüero e Forlán... E parlarai pas de Liverpool o dau PSV....

Mai la bona nòva per ièu es que l'1 d'octòbre serai a Madrid e es lo jorn de la partida entre l'OM e l'Atlético, dins l'estadi Calderón! I anarai segurament, a l'estadi Calderón, o vòli pas mancar!!! Tamben fau dire que fòrça dei mieus amics madrilencs son d'afogats de l'Atlético, e segur qu'anarai pas solet a l'estadi ;) I aurà quauqu'un per m'acompanhar ;)

                    

La premiera partida de l'Olimpic de Marselha dins aquesta Liga dei Campions serà lo 17 de setembre, còntra Liverpool, a l'Estadi Velodròm a Marselha.

L'Olimpic de Marselha a ganhat uèi còntra l'equipa norvegiana dau Brann de Bergen 2-1 a l'Estadi Velodròm. (2 buts de Mamadou Niang!!!) Coma ja avián ganhat ailí 1-0, aquò vòl dire que l'OM tòrna a la Liga dei Campions aquesta sason!!!