De causas e d'autras

Bonjorn en totei!!

Non, ai pas encara desaparegut totalament!!! Mai aquesta darrièra setmana foguèt un pauc cargada per ièu! Era la premiera setmana de cors per aquesta annada universitaria...E lei professors an decidit de començar un pauc fòrt... Ges de presentacion per la majoritat dei matèrias... Preferissiái lei dintradas de l'escòla primaria ;)

Vau assajar de far un resumit d'aquela setmana:

-lei cors: lei professors son un pauc estranges mai quasi totei ben simpatics... Çò que m'agrada lo mens es que per anar ai cors dau dijous (Amenatjament dau territòri), me fau prendre la veitura per anar de l'autre costat de Madrid, a l'escòla de camins, canaus e pòrts (qu'es pas mon escòla, mai coma lei professors son d'ailà se desplaçan pas!)... E aqueste dijous, i siáu anat ambé una amiga en veitura e nos siám perduts dins lei tuneus sota Madrid (l'autorota M-30...)... Mai après una ora (e mai de 1000 taxis que nos cridèron dessus per qu'anèssem mai rapidament...) avèm trobat l'escòla....

-l'annada passada èri l'unic estudiant estrangièr (o quasi l'unic) de tota l'escòla a Madrid e ara siám 5 forestiers dins ma classa! Ièu, 3 gabachos (es coma se dison lei frances per leis espanhòus), una alemanda... E i a tamben una basca, mai es arribada a l'escòla l'annada passada coma ièu ;) Ambé dos dei frances, aièr siám anats a Toleda, en Castilha. Cresi qu'es lo uechen còup qu'i vau e m'agrada totjorn :)

-Gramarci a Jan-Pèire que m'a mandat son libre per aprene lo provençau "Òsca!". L'ai pas encara començat mai cresi que va m'ajudar fòrça dins mon aprendissatge de l'occitan.

-Per acabar, parlem un pauc d'espòrt:

Desfacha de l'OM a Madrid, còntra l'Atletico 2-1, per la liga dei Campions. Mai lo mai important de la partida foguèt pas malurosament la partida mai çò que se passèt dins l'estadi, entre la policia espanhola e leis afogats de l'Olimpic de Marselha, e tot aquò se passèt a causa d'una banderola ambé ren de realament acipant... E tamben voliáu dire que foguèri decebut per l'actituda racista de quauqueis afogats de l'Atletico... L'Atletico e Liverpool an 6 ponchs, e Marselha e lo PSV 0.

Victòria de l'OM en campionat còntra Caen 2-1.

Lo marrit pantais dau Nimes Olimpic dins lo campionat de Liga 2 s'arresta pas... Desfacha 5-0 còntra lo Racing (d'Estrasborg) a l'estadi de la Meinau... Lei crocodils an sonque 5 ponchs e son darrièrs. Estrasborg es premier. Va èstre dificile de se mantenir en Liga 2!

Méfi: dins aqueste messatge mon paure cerveu a pas foncionat!

Bonjorn a totei!

Vos escrivi dau mieu apartament a Madrid!

Ai tornat aièr, ambé la veitura. "Sonque" son 10 oras de viatge, 12 oras au totau se comptam lei pausas... Es un pauc longuet subretot qu'èri solet per far tot lo viatge! Sonque m'acompanhavan la ràdio que foncionava pas entre lei montanhas (e n'i a un fum entre Avinhon e Madrid^^), lo lector mp3 dins lo quau avià pas mes pron de cançons, lei panèus tot en francés entre Avinhon e la frontiera ambé Catalonha, tot en catalan fins a Fraga en Aragon e tot en castelhan fins a Madrid! En fach, es pas verai que lei panèus eran totei en catalan en Catalonha, qu'ai vist un panèu direccion..... VIELHA escrich en occitan :D E tambén m'acompanhavan un fum de camions, qu'aviàn decidit totei de prene la meteissa rota que ièu... Subretot qu'i avià un fum d'òbras, e sovent i avià pas qu'una via sus l'autorota e podià pas despassar...

Lo darrièr còup qu'aviái tornat a Madrid l'aviái fach en avion, es fòrça mai rapide mai aqueste còup es lo retorn "definitiu" (per aquesta annada) e coma ai besonh de la veitura aicí a Madrid... E òc, es la fin dei vacanças d'estiu (e tambén la fin de l'estiu (aièr fasià un freg pendent lo viatge... Podiá pas creire qu'anavi vèrs lo sud...)

Uèi era lo jorn per m'inscriure a la fac, e aqueste còup m'an laissat m'inscriure sensa problema! Oficialament a partir de uèi, siáu un vertadier estudiant en segonda annada d'engenhairia superiora en geodesia e cartografia!! (Ja o sabi que fa un pauc pedant coma nom mai l'ai pas chausit ièu ;)) Comenci lei cors lo 29 de setembre (ja o ai escrich aquò, non?)

Siáu un pauc partejat entre dos sentiments ara: siáu content perque vau tornar veire meis amics madrilencs mai pas tròp content e un pauc triste de laissar meis amics avinhonencs e ma familha...

En de mai, aquesta sera l'OM a perdut còntra Sochaux per la copa de la Liga... Ai vist la partida per Internet despuèi Madrid... Era vertadierament afrós de veire lo niveu de l'OM a una semana de la partida còntra l'Atletico aicí a Madrid per la liga dei Campions... Sabi pas se vòli veire aqueste desastre en dirècte dins l'estadi o se l'anarai veire ambé d'amics dins un bar per poder demembrar la desfacha ambé d'alcòl.... ;) La partida es l'1 d'octòbre...

Desolat, mai ai parlat vertadierament de tot e de ren dins aqueste messatge ;) Per terminar aqueste messatge totalament incoerent, vau escriure çò qu'ai dich a un dei mieus amics madrilencs uèi... Parlèvem de causas e d'autras (pas dau blòg non ;)) e m'a dich quauqua ren coma, en parlant d'economia:

"...nos vamos a comer a los franceses con patatas..."
= "Anam manjar lei francés ambé de tartiflas"

Ai pensat directament a la tortilha espanhòla que se cosina ambé de tartiflas mentre l'aumeleta francesa se cosina sensa tartiflas... L'aumeleta coma metafòra economica... A meditar :D

Uèi es un grand jorn! Es mon premier jorn sensa lunetas! Ai decidit de crompar de lentilhas, perque aprep 15 ans ambé de lunetas, cresi que ja era ora de cambiar quauqua ren dins ma vida. Mai foguèt pas tot tant facile coma lo pensavi...

Aièr, anèri a l'oftalmològ e a l'optician per me faire de lunetas novelas e tamben de lentilhas. Au moment d'assajar de metre lei lentilhas, i ai pas capitat... Barravi leis uèlhs abans de metre la lentilha... Ai assajat pendent 2 ò 3 oras, ambé l'optician... Mai aviam abandonat... L'unica causa qu'aviái  capitat era d'aver leis uèlhs roges... Finalament l'ai capitat uèi de matin, tot solet, en mai d'1 ora per lo premier uèlh, e "soncament" 30 minutas per lo segond... Mai siáu fòrça content de l'aver fach, perque me cambia totalament la vida! Es fòrça estrange au començament de veire plan sensa lunetas mai òm s'acostuma rapidament. Siáu en una fasa d'assai per veire si pòdi utilisar lei lentilhas cada jorn... Esperem que vau poder lei suportar!

Mèfi! Aqueste messatge es totalament inutile :D

Siáu tornat de Madrid! Totjorn quand tòrni d'Espanha, tòrni ambé de costumas alimentarias diferentas. Vaquí una lista de çò qu'ai enveja de manjar (ò beure), ara:

Vos presenti lo milh grilhat e salat, en pichon sac de 250 gramas... quand comenci de'n manjar pòdi pas m'arrestar, es una vertadièra dròga per ièu! En pus, costa realament pas ren en Espanha... (Veni d'acabar lo sac qu'ai entornat de Madrid :'()

Una autra dròga mieuna: lei "Filipinos" au chicolat blanc, pusleu l'imitacion facha per Carrefour d'aquestei saboroses pastissons (e en pus son pas cars!)

E fin finala, la cervesa, perque cada cop que vau a Madrid, vau beure un cop ambé lei mieus amics, e subretot bevon de cervesa ailí ;) Lo divendres ai gostat la Murphy's Red dins un bar irlandés dau barri de Malasaña e es plan bona ;)

Uèi, siáu anat a mon escòla d'engenhaires a Madrid per m'inscriure per lei cors d'aquesta annada. Mai quina sospresa!!! M'an pas volgut inscriure perque mancava UN document que mon escòla en França aviá oblidat... De segur, pòdon pas començar se lor manca un papier... Çò pièger es que ja sabon tot çò qu'i a dins aqueste document mai non, o vòlon pas faire :( Ai de tornar a Lion la setmana que vén per aquò d'aguer aqueste document e puèi m'inscriure  a Madrid una setmana abans de començar lei cors... Au darrièr moment plan segur... Per demembrar tot aquò aqueste ser me'n vau ambé quauqueis amics a beure un cop ;) Aquò's çò que sabon ben faire a Madrid :p

PS: Fa subre freg a Madrid uèi :'(

Bonjorn a totei !

Siáu a Madrid pendent 4 jorns per resòuvre quauquei problemas ambé l'administracion espanhòla, e per faire una demanda de borsa d'estudis. Per aquò, bessai aurai pas léser per mandar un fum de messatges. Tòrni lo dimenge an Avinhon ! A lèu !

Aprèp un an de tractacions ambé mon escòla d'engenhaires en França (Escòla Centrala de Lion) e mon escòla a Madrid (Escòla Tecnica Superior d'Engenhaires en Topografia, Geodesia e Cartografia de l'Universitat Politecnica de Madrid -- un pauc lònguet coma nom!) vèni de recebre la confirmacion: an sinhat l'acòrdi de doble-diplòma e per aquò, l'an que vén, contunhi d'estudiar a Madrid e poirai... obtenir lo diplòma! Aquò era pas segur (en coneissant l'administracion espanhola...), m'aurián pogut dire que tornèsse a França sensa diplòma... Mai fin finala l'an sinhat!!!! Es un vertadièr jorn de fèsta :D Comenci lei cors lo 29 de setembre :) Vos meti una fòto de la mieuna escòla: es fòrça mens polida en realitat ;)

Vos fau un pichon pòst subre lo mieu vilatge abans d'anar dormir ;) I aurà mai que d'un article subre mon vilatge e aqueste es lo premier :) La màger part deis informacions e dei fotòs leis ai trobadas sul siti "Pujaut, mon village" de Gwenaël Loriette e Cedric Jouffret (http://pujaut.ifrance.com/)

Lo vilatge onte sempre ai demorat se sòna Pujaut (en francés). Sembla que lo sieu nom provençau siá Pijaut ò Pièg-Aut. (M'agrada mai Pièg-Aut ;)). Seis estatjants son lei pijaulencs (pijoulen en grafia mistralenca). Çò segur es que vèn dau latin "Podium Altum", nom dau vilatge au segle XIII.

Uèi vos presenti un premier "monument": lo molin de vent dau vilatge! Se situa sus la còla que domina lo vilatge, a 120m d'altituda (e es tot pròche dau mieu ostau ;)).

Ja o sabi, sembla pas un molin, mai l'es ;) Soncament li manca la part auta! Lo mieu vilatge es un vilatge de molins... o melhor dich, era un vilatge de molins. Uèi s'utilisan pas pus! I aviá 4 tipes de molins dins lo vilatge: 6 molins d'aiga (3 foguèron subrenomats "lei molins dau meu" e 1 "lo molin dau pebre" perque lo riu que l'alimentava era tan pichon que lei gents, per se trufar, disían que soncament podiá moùrre de pebre), 3 molins d'òli e 2 molins de vent coma aqueu de la fotò. Aqueste molin se pòt pas destruire perque es un ponch geodesic de l'IGN (Institut Geografic Nacionau).

Ièr, i aguèt lo tiratge au sòrt deis equipas per la Liga dei Campions dins la quala i a l'OM que s'a qualificat. Lo grop de l'OM es:

LIVERPOOL (Englaterra)
PSV EINDHOVEN (Païses Basses)
OLIMPIC DE MARSELHA
ATLÉTICO DE MADRID (Espanha)

Es un grop fòrça dificile per l'OM per amòr que leis equipas son totei d'un niveu fòrça aut: e mai l'Atlético de Madrid, qu'es supausat èstre l'equipa mai febla dau grop, es un gigant dau fotbòl internacionau qu'a una ataca meravilhosa aquesta sason ambé lo "Kun" Agüero e Forlán... E parlarai pas de Liverpool o dau PSV....

Mai la bona nòva per ièu es que l'1 d'octòbre serai a Madrid e es lo jorn de la partida entre l'OM e l'Atlético, dins l'estadi Calderón! I anarai segurament, a l'estadi Calderón, o vòli pas mancar!!! Tamben fau dire que fòrça dei mieus amics madrilencs son d'afogats de l'Atlético, e segur qu'anarai pas solet a l'estadi ;) I aurà quauqu'un per m'acompanhar ;)

                    

La premiera partida de l'Olimpic de Marselha dins aquesta Liga dei Campions serà lo 17 de setembre, còntra Liverpool, a l'Estadi Velodròm a Marselha.