De causas e d'autras

Adieu colègas!!

Fa realament longtemps qu'aviáu ren mandat dins mon blòg, ne siáu desolat, mai es verai qu'ai pas realament lo temps, e en de mai ai pas realament grand causa a contar.

A l'universitat, es un pauc l'abituda... Mai ai començat quauqua ren de nòu, trabalhi lei matins dins un projècte de cèrca sus la creissènça urbana de la ciutat de Madrid, e m'interessa fòrça. Per aquó ai pas realament fòrça temps per escriure aici ;)

Fa 2 setmanas, siáu anat en Belgica ambé meis amics espanhòus de l'universitat, per veire un amic nòstre qu'es ailí  en Erasmus. Siám anats a Leuven, ont estudia nòstre amic, e tanben avèm visitat Brussèla, Anvers e Bruja. A fòrça nevat pendant tota la dimenjada, coma lo podetz veire!

Belgica es un païs fòrça polit, subretot sota la nèu. Mai lo problema es quand siás dins la carrièra tot lo jorn ambé lo freg que fa e la pluèja !!!!!!

Espèri poder escriure mai dins aqueste blòg, cresi qu'aurai mai de temps pendent lei vacanças de Nadau per exemple.

Lo poton a totei!

Bonjorn en totei!!

Non, ai pas encara desaparegut totalament!!! Mai aquesta darrièra setmana foguèt un pauc cargada per ièu! Era la premiera setmana de cors per aquesta annada universitaria...E lei professors an decidit de començar un pauc fòrt... Ges de presentacion per la majoritat dei matèrias... Preferissiái lei dintradas de l'escòla primaria ;)

Vau assajar de far un resumit d'aquela setmana:

-lei cors: lei professors son un pauc estranges mai quasi totei ben simpatics... Çò que m'agrada lo mens es que per anar ai cors dau dijous (Amenatjament dau territòri), me fau prendre la veitura per anar de l'autre costat de Madrid, a l'escòla de camins, canaus e pòrts (qu'es pas mon escòla, mai coma lei professors son d'ailà se desplaçan pas!)... E aqueste dijous, i siáu anat ambé una amiga en veitura e nos siám perduts dins lei tuneus sota Madrid (l'autorota M-30...)... Mai après una ora (e mai de 1000 taxis que nos cridèron dessus per qu'anèssem mai rapidament...) avèm trobat l'escòla....

-l'annada passada èri l'unic estudiant estrangièr (o quasi l'unic) de tota l'escòla a Madrid e ara siám 5 forestiers dins ma classa! Ièu, 3 gabachos (es coma se dison lei frances per leis espanhòus), una alemanda... E i a tamben una basca, mai es arribada a l'escòla l'annada passada coma ièu ;) Ambé dos dei frances, aièr siám anats a Toleda, en Castilha. Cresi qu'es lo uechen còup qu'i vau e m'agrada totjorn :)

-Gramarci a Jan-Pèire que m'a mandat son libre per aprene lo provençau "Òsca!". L'ai pas encara començat mai cresi que va m'ajudar fòrça dins mon aprendissatge de l'occitan.

-Per acabar, parlem un pauc d'espòrt:

Desfacha de l'OM a Madrid, còntra l'Atletico 2-1, per la liga dei Campions. Mai lo mai important de la partida foguèt pas malurosament la partida mai çò que se passèt dins l'estadi, entre la policia espanhola e leis afogats de l'Olimpic de Marselha, e tot aquò se passèt a causa d'una banderola ambé ren de realament acipant... E tamben voliáu dire que foguèri decebut per l'actituda racista de quauqueis afogats de l'Atletico... L'Atletico e Liverpool an 6 ponchs, e Marselha e lo PSV 0.

Victòria de l'OM en campionat còntra Caen 2-1.

Lo marrit pantais dau Nimes Olimpic dins lo campionat de Liga 2 s'arresta pas... Desfacha 5-0 còntra lo Racing (d'Estrasborg) a l'estadi de la Meinau... Lei crocodils an sonque 5 ponchs e son darrièrs. Estrasborg es premier. Va èstre dificile de se mantenir en Liga 2!

Méfi: dins aqueste messatge mon paure cerveu a pas foncionat!

Bonjorn a totei!

Vos escrivi dau mieu apartament a Madrid!

Ai tornat aièr, ambé la veitura. "Sonque" son 10 oras de viatge, 12 oras au totau se comptam lei pausas... Es un pauc longuet subretot qu'èri solet per far tot lo viatge! Sonque m'acompanhavan la ràdio que foncionava pas entre lei montanhas (e n'i a un fum entre Avinhon e Madrid^^), lo lector mp3 dins lo quau avià pas mes pron de cançons, lei panèus tot en francés entre Avinhon e la frontiera ambé Catalonha, tot en catalan fins a Fraga en Aragon e tot en castelhan fins a Madrid! En fach, es pas verai que lei panèus eran totei en catalan en Catalonha, qu'ai vist un panèu direccion..... VIELHA escrich en occitan :D E tambén m'acompanhavan un fum de camions, qu'aviàn decidit totei de prene la meteissa rota que ièu... Subretot qu'i avià un fum d'òbras, e sovent i avià pas qu'una via sus l'autorota e podià pas despassar...

Lo darrièr còup qu'aviái tornat a Madrid l'aviái fach en avion, es fòrça mai rapide mai aqueste còup es lo retorn "definitiu" (per aquesta annada) e coma ai besonh de la veitura aicí a Madrid... E òc, es la fin dei vacanças d'estiu (e tambén la fin de l'estiu (aièr fasià un freg pendent lo viatge... Podiá pas creire qu'anavi vèrs lo sud...)

Uèi era lo jorn per m'inscriure a la fac, e aqueste còup m'an laissat m'inscriure sensa problema! Oficialament a partir de uèi, siáu un vertadier estudiant en segonda annada d'engenhairia superiora en geodesia e cartografia!! (Ja o sabi que fa un pauc pedant coma nom mai l'ai pas chausit ièu ;)) Comenci lei cors lo 29 de setembre (ja o ai escrich aquò, non?)

Siáu un pauc partejat entre dos sentiments ara: siáu content perque vau tornar veire meis amics madrilencs mai pas tròp content e un pauc triste de laissar meis amics avinhonencs e ma familha...

En de mai, aquesta sera l'OM a perdut còntra Sochaux per la copa de la Liga... Ai vist la partida per Internet despuèi Madrid... Era vertadierament afrós de veire lo niveu de l'OM a una semana de la partida còntra l'Atletico aicí a Madrid per la liga dei Campions... Sabi pas se vòli veire aqueste desastre en dirècte dins l'estadi o se l'anarai veire ambé d'amics dins un bar per poder demembrar la desfacha ambé d'alcòl.... ;) La partida es l'1 d'octòbre...

Desolat, mai ai parlat vertadierament de tot e de ren dins aqueste messatge ;) Per terminar aqueste messatge totalament incoerent, vau escriure çò qu'ai dich a un dei mieus amics madrilencs uèi... Parlèvem de causas e d'autras (pas dau blòg non ;)) e m'a dich quauqua ren coma, en parlant d'economia:

"...nos vamos a comer a los franceses con patatas..."
= "Anam manjar lei francés ambé de tartiflas"

Ai pensat directament a la tortilha espanhòla que se cosina ambé de tartiflas mentre l'aumeleta francesa se cosina sensa tartiflas... L'aumeleta coma metafòra economica... A meditar :D

• Uèi, la candidatura "Marselha Provença 2013" a ganhat la seleccion de la capital europenca de la cultura, còntra Bordèu, Lion e Tolosa. Mai en legir la presentacion de la candidatura ai pas vist ren subre la cultura provençala... Espèri qu'au final i aurà quauqua ren de provençau dins tot aquò... Es una ocasion de pas mancar!

• Mai lei fotbolaires de l'Olimpic de Marselha an pas agut tant d'astre... An perdut 2-1 còntra Liverpool en la Liga dei Campions, a l'estadi Velodròm de Marselha...  Avián ben començat la partida, ambé lo but de Cana a la vint-e-quatrena minuta, mai aqueste but leis an desestabilisat totalament e per aquò, leis angleses an pogut metre dos buts (dos buts de Gerrard). Pendent la segonda mièg-temps, an ben jogat lei marselheses mai n'an pas pogut cambiar lo resultat: desfacha 2-1... Faudrá ganhar an Eindhoven e a Madrid per lei doás partidas que venon...

Vos boti aci-dejòs una videó (i a pas un fum d'imatges, çò important es lo sòn) ma cançon favorita dau grop marselhés Massilia Sound System: "I a tant de causas sus terra" dau sieu album "Occitanista". Foguèt la premiera cançon en occitan que saupèri entierament.

Paraulas:

I a tant de causas sus terra
Que nos gonflan sens quitar
Un fum que nos desespèra
Que podèm pus endurar
Vos volèm cantar amassa
Tot çò que nos fa cagar
Nos acaissa, nos alassa
E nos fa emmaliciar.

Ò fan que la vida es dura
Siam totjorn tarrabustats
Se diriá que la natura
Es aquí per tracassar.
La pluièa nos pren la tèsta
Lo soleu nos fa cramar
L'ivèrn nos fau quatre vestas
E l'estiu siam tot banhat.
Es jamai la bòna plaça
Quand nos volèm repausar
Ò i a de vent que nos glaça
Ò d'èrbas per nos fissar.
De cabridans, de fòrnigas
De tavans ne'n manca pas
Pòs pas manjar una figa
Sens un vèrme destorbar.
Vos volèm cantar amassa
Tot çò que nos fa cagar
Nos acaissa, nos alassa
E nos fa emmaliciar.

Les hommes se croient très forts mais l'univers les surpasse
Tous les jours le hasard fait que des choses se passent
N'importe quoi, à tout moment, peut devenir une menace
Quand se déchaînent les éléments, ils nous remettent à notre place
On a la bombe atomique et tout le binz technologique
On bricole les molécules et le code génétique
On a même inventé des armes bactériologiques
Mais on est terrorisé par le zonzon d'un moustique
On fabrique des outils qui font mourir, qui font souffrir
Et ensuite on a envie, un beau jour, de s'en servir
Pour ne pas être asservi ou au contraire asservir
Mais la nature, en un éclair, pourrait tous nous anéantir !

Ambé tot aqueu bestiari
N'i a pron per venir fadat
Mai per malur l'inventari
Es luenh d'èstre acabat.
Leis umans òc mon collèga
Podèm pas leis encapar
Lei vielhs fan totjorn la bèba
Lei jovents son tròp fracàs.
Coma comptar leis estrassas
Lei cònòs, leis enfavats,
Lei gelós de totei raças
Lei pebrons, leis ensucats.
Tant e tant vira la tèsta
Arrestèm de carcular !
Tenètz lei botelhas lestas
Que çai siam per festejar.

Aièr, a l'estadi Chaban-Delmas de Bordèu, Marselha a obtengut lo ponch de la partida nula còntra lei Girondins, ambé un but de Koné a la tresena minuta per l'OM e un but de Chamakh a la vint-e-cinquena minuta per Bordèu. Es un plan bon resultat per l'OM. Mai lo problema es que l'arbitre de la partida entre Lion e Niça a donat la victòria a Lion ambé un penaltì inexistent per Lion al darrièr moment... Per aquò, ambé 11 ponchs, l'OM es segond dau campionat de Liga 1. Lion es premier ambé 13 ponchs.